តាមការចុះផ្សាយរបស់ The Nation ដែលស្រង់សម្ដីលោក Adisorn Singhsacha បានឱ្យដឹងថា ក្រុមហ៊ុនរបស់លោកបានផ្ដល់ការប្រឹក្សាយោបល់ដល់រដ្ឋាភិបាលឡាវក្នុងការបោះផ្សាយសញ្ញាប័ណ្ណដែលមានទំហំ ៩,៥៩ពាន់លានបាតនៅក្នុងទីផ្សារហិរញ្ញវត្ថុថៃចាប់ពីឆ្នាំ២០១៣ រហូតដល់បច្ចុប្បន្ន។ ក្រៅពីរដ្ឋាភិបាលឡាវ ក្រុមហ៊ុនលោកក៏ធ្លាប់បានផ្ដល់ប្រឹក្សាយោបល់ដល់ក្រុមហ៊ុនឡាវមួយឈ្មោះ EDL-Generation ឱ្យបោះផ្សាយសញ្ញាប័ណ្ណទំហំ ៦,៥ពាន់លានបាតនៅទីផ្សារហិរញ្ញវត្ថុថៃផងដែរ។
ក្រុមហ៊ុនដដែលនេះ ក៏កំពុងតែផ្ដល់ការប្រឹក្សាយោបល់ដល់រដ្ឋាភិបាលប្រទេស មីយ៉ាន់ម៉ា និងកម្ពុជា ដើម្បីឱ្យប្រទេសទាំងពីរអាចកៀរគរប្រមូលប្រភពធនធានអភិវឌ្ឍហេដ្ឋារចនាសម្ព័ន្ធ។
ជាទស្សនៈរបស់អ្នកជំនាញរូបនេះ លោកថា ប្រទេសថៃនឹងអាចប្រជែងប្រទេសសិង្ហបុរី និងម៉ាឡេស៊ី ក្នុងការដើរតួនាទីជាប្រភពហិរញ្ញប្បទាននៅប្រទេសក្នុងតំបន់អាស៊ាន។
លោក Adisorn Singhsacha ថ្លែងបន្តថា ៖«យើងសម្លឹងឃើញពីតម្រូវការថវិកាយ៉ាងរឹងមាំពីបណ្ដាប្រទេសនៅតំបន់អាស៊ានជាពិសេសគឺឡាវ មីយ៉ាន់ម៉ា កម្ពុជា ឥណ្ឌូណេស៊ី និងវៀតណាម ដែលត្រូវការធនធានយកមកអភិវឌ្ឍហេដ្ឋារចនាសម្ព័ន្ធ។ យើងមើលឃើញពីឱកាសធ្វើពាណិជ្ជកម្មសម្រាប់ទីផ្សារហិរញ្ញវត្ថុថៃ ដើម្បីដើរតួជាប្រភពហិរញ្ញប្បទានសម្រាប់ប្រទេសទាំងនេះ»។
ជាការយល់ឃើញរបស់ លោក Adisorn Singhsacha លោកចង់ផ្ដល់ការប្រឹក្សាដល់ប្រទេសឡាវ កម្ពុជា និងមីយ៉ាន់ម៉ា ទាំងផ្នែករដ្ឋាភិបាល និងវិស័យឯកជន ឱ្យបោះផ្សាយសញ្ញាបណ្ណនៅក្នុងទីផ្សារប្រទេសថៃក្នុងទំហំចន្លោះពី ១២ពាន់លានបាត ទៅ ២០ពាន់លានបាតក្នុងមួយឆ្នាំចាប់ពីឆ្នាំ២០១៥តទៅ៕
No comments:
Post a Comment