ឃ្លាំងចំណេះដឹង-The Knowledge Store: 2014

Saturday, December 27, 2014

ចង់ដឹងថា ឥណ្ឌាដែលជាយក្សនៅអាស៊ីខ្លាំងប៉ុណ្ណា សូមទស្សនាកម្លាំងយោធាប្រទេសនេះ! (វីដេអូ)

ការបង្ហាញពីកងកម្លាំងយោធារបស់ឥណ្ឌាប្រភព៖ ibtimes.com

ឥណ្ឌាជាប្រទេសដ៏ធំមួយ នៅលើពិភពលោក ជាពិសេសគឺចំនួនប្រជាជន ដែលស្ថិតនៅលំដាប់ទី ២ បន្ទាប់ពីចិន។ បើនិយាយអំពី សេដ្ឋកិច្ចវិញ ប្រទេសក៏មានការរីកចម្រើនគួរឲ្យកត់សម្គាល់ផងដែរ។ ក្នុងតំបន់អាស៊ី ប្រទេសនេះត្រូវបានគេប្រសិទ្ធិនាមថា ជាយក្សប្រចាំតំបន់។

ដោយសារតែ មានផ្ទៃដីធំ និង ប្រជាជនច្រើនដែលសម្បូរទៅដោយប្រភពសាសនាជាច្រើននោះ ឥណ្ឌាមិនអាចធ្វេសប្រហែសក្នុងការពង្រឹងវិស័យយោធាបានឡើយ។ ជាពិសេស ឥណ្ឌាតែងមានបញ្ហាតានតឹងជាមួយនឹងប៉ាគីស្ថានដែលបានបែកចេញពីគ្នាកាលពីឆ្នាំ ១៩៤៧។ ជារឿយៗ ប្រទេសជិតខាងទាំងពីរនេះ តែងមានការប៉ះទង្គិចគ្នានៅតាមព្រំដែន ជាពិសេសនៅតំបន់កាស្មៀ។

សូមបញ្ជាក់ថា ទាំង ឥណ្ឌា និង ប៉ាគីស្ថានសុទ្ធតែមានអាវុធនុយក្លេអ៊ែរ ក្នុងដៃ។ ក្រៅពីនេះ ឥណ្ឌាក៏តែងមានជម្លោះ តានតឹងជាមួយចិនផងដែរ នៅតាមតំបន់ព្រំដែន។ ស្ថានភាពទាំងនេះ ធ្វើឲ្យឥណ្ឌា កាន់តែខិតខំពង្រឹងសមត្ថភាពយោធារបស់ខ្លួន ឲ្យកាន់តែខ្លាំងឡើងៗ ទៅតាមលទ្ធភាពដែលអាចធ្វើទៅបាន ព្រោះគ្មាននរណាអាចធានាសុវត្ថិភាពឥណ្ឌាក្រៅ ពីខ្លួនឯងនោះទេ។

សង្គ្រាមបរមាណូអាចផ្ទុះឡើង តាមសេណារីយោទាំងប្រាំប្រការនេះ

ខាងក្រោមនេះជាបទវិភាគរបស់លោក Thomas Nicholas ស្ដីពីសង្គ្រាមបរមាណូ (Nuclear War) ដែលអាចកើតឡើងនាពេលខាងមុខក្នុងភាគរយតិចបំផុត ប៉ុន្តែក៏មិនអាចទុទ្ទិដ្ឋិនិយមថា «នឹងមិនកើតមានឡើងទាល់តែសោះ» នោះទេ។ លោក Thomas Nicholas បានបង្ហាញសេណារីយោ (scenario) ចំនួនប្រាំយ៉ាង ហើយផ្អែកតាមសេណារីយោទាំងនេះ ដែលសង្គ្រាមបរមាណូអាចផ្ទុះឡើងសម្រាប់ពេលអនាគត។ លោក Thomas M. Nichols ជាគ្រូបង្រៀនមុខវិជ្ជា «កិច្ចការសន្តិសុខជាតិ» នៅសាកលវិទ្យាល័យការពារជាតិ the Naval War College។

សេណារីយោទី១ ៖ សង្គ្រាមកើតឡើងដោយសារកំហុសគ្រឿងម៉ាស៊ីន (Mechanical Accident)
ប្រសិនបើបានទស្សនាភាពយន្តហូលីវូតរឿង «អ្នកពិឃាត ឬអ្នកផ្ដាច់ជីវិត – Terminator II» ចេញផ្សាយកាលពីឆ្នាំ១៩៩១ និយាយអំពីកំហុសបច្ចេកទេសដោយសារ Skynet ដែលបានបាញ់គ្រាប់បរមាណូទៅប្រទេសរុស្ស៊ី ហើយរុស្ស៊ីបានបាញ់ត្រឡប់មកអាមេរិកវិញ។

...ចង់ដឹងថា ឥណ្ឌាដែលជាយក្សនៅអាស៊ីខ្លាំងប៉ុណ្ណា សូមទស្សនាកម្លាំងយោធាប្រទេសនេះ! (វីដេអូ)...

នេះជាកំហុសបច្ចេកទេសសុទ្ធសាធ ហើយមិនមែនជាចេតនារបស់អ្នកដឹកនាំប្រទេសទាំងពីរទាល់តែសោះ។ នេះជាក្ដីស្រមៃរបស់អ្នកនិពន្ធ និងអ្នកដឹកនាំខ្សែភាពយន្តនេះប៉ុណ្ណោះ ហើយជាឧទាហរណ៍ដែលបញ្ជាក់អំពីលទ្ធភាពដែលផ្ទុះសង្គ្រាមបរមាណូដោយសារគ្រឿងម៉ាស៊ីន។

សេណារីយោទីពីរ ៖ កំហុសអចេតនារបស់មនុស្ស
ដរាបណាគ្រឿងម៉ាស៊ីនត្រូវបានគ្រប់គ្រងបញ្ជាដោយមនុស្ស ដរាបនោះកំហុសអចេតនានឹងកើតមានដោយជៀសមិនផុត។ កំហុសអចេតនានេះហើយ ដែលនាំឲ្យភាគីម្ខាងទៀតបកស្រាយច្រឡំ (misinterpretation)។ តាំងពីណាពីណី រហូតមកទល់នឹងពេលបច្ចុប្បន្ន មេដឹកនាំប្រទេសមហាអំណាចធំៗ ដូចជារុស្ស៊ី និងសហរដ្ឋអាមេរិក។ល។ សុទ្ធតែមានខ្សែទាក់ទងពិសេស ដើម្បីជំរះរាល់វិមតិសង្ស័យនានា ពាក់ព័ន្ធនឹងវិស័យសន្តិសុខអន្តរជាតិ ជាពិសេសពាក់ព័ន្ធនឹងសព្វាវុធ ដើម្បីក្ដាប់ព័ត៌មានឲ្យជាប់ និងគ្រប់គ្រងសភាពការណ៍ ពុំនោះទេ ប្រាកដជាត្រូវច្រឡំបាញ់គ្រាប់មីស៊ីលបរមាណូដាក់គ្នាមិនខាន។

សេណារីយោទី ៣៖ ការបង្ហាញកម្លាំងដាក់គ្នាទៅវិញទៅមក (A Show of Force)
ប្រទេសមហាអំណាចធំៗ ដូចជារុស្ស៊ី - ចិន – ឥណ្ឌា ។ល។ ចូលចិត្តធ្វើសមយុទ្ធ (military exercise) ឬក្បួនព្យុហយាត្រាកងទ័ព (military parade) ប្រចាំឆ្នាំដោយបង្ហាញអាវុធទំនើបៗ ដែលខ្លួនមាន។ ពេលខ្លះ «មីស៊ីលអន្តរទ្វីបបំពាក់ក្បាលគ្រាប់បរមាណូ» ក៏ត្រូវគេដាក់បង្ហាញ និងថតដាក់ទូរទស្សន៍ថែមទៀត។ តិចឬច្រើន ទង្វើនេះជាការសម្ញែង ឬបង្អួតកម្លាំងយោធា។ ប្រទេសដែលយល់ថាជាបច្ចាមិត្តនឹងគ្នា នឹងខិតខំរត់ប្រណាំង ដើម្បីកុំឲ្យចាញ់ប្រៀបគ្នា នាំឲ្យកំដៅនយោបាយកាន់តែក្ដៅឡើងៗ។

...ក្រុងវ៉ាស៊ីនតោនបញ្ជូនប្រព័ន្ធរ៉ាដាចាប់ម៊ីស៊ីលទី២ទៅជប៉ុន...

សេណារីយោទី៤៖ ធ្លាក់ចូលក្នុងភ្នក់ភ្លើងសង្គ្រាមដោយសារមានអ្នកទីបី
នៅក្នុងនយោបាយអន្តរជាតិ មិនអាចមានមិត្ត និងក៏មិនអាចមានសត្រូវ។ មានន័យថាពេលខ្លះក្ដៅ ពេលខ្លះត្រជាក់នឹងគ្នា ដើម្បីផលប្រយោជន៍ជាតិរៀងៗខ្លួន។ ពេលខ្លះ ប្រទេសដែលមើលពីសំបកក្រៅ ជាសត្រូវស៊ីសាច់ហុតឈាម ជាមិត្តភក្ដិនឹងគ្នាទៅវិញទេ គ្រាន់តែគេសំដែងឲ្យតែល្អមើល ទៅតាមសិល្បៈនយោបាយ។ ផ្ទុយទៅវិញ ប្រទេសដែលធ្លាប់ល្អូកល្អឺននឹងគ្នា គ្រាន់តែគេចាក់រុកតែបន្តិច បែរជាមើលមុខគ្នាមិនចំ ឬក្លាយជាសត្រូវនឹងគ្នា។

ឧទាហរណ៍ កាលពីមុន មានព័ត៌មានផ្សាយថាអាហ្វ្រិកខាងត្បូងលួចផលិតគ្រាប់បែកបរមាណូស្ងាត់ៗ។ ព័ត៌មាននេះទំនងមិនពិតទេ ព្រោះលទ្ធភាពដែលថាអាហ្វ្រិកខាងត្បូងផលិតគ្រាប់បរមាណូគឺភាគរយតិចណាស់សឹងតែគ្មានតែម្ដង។ ប៉ុន្តែព័ត៌មាននេះ វាបង្កើតការមិនទុកចិត្តគ្នាក្នុងចំណោមប្រទេសជាមិត្ត។ ប្រទេសដែលត្រូវគេសង្ស័យ អស់ពីគេសង្ស័យ ក្នុងពេលដែលខ្លួនមិនបានផលិតបរមាណូផង អាចនឹងអាក់អន់ចិត្តអាខ្លួនឯងមិនបានផលិតផង គេថាផលិត ផលិតយកតែម្ដងទៅ។ នេះជាសេណារីយោដ៏គ្រោះថ្នាក់ ហើយសត្រូវនឹងគ្នាឯង ដោយសារគេចាក់រុក ជាលក្ខណៈ «ព្រួញមួយ បាញ់បានសត្វពីរ»។

សេណារីយោទី៥ ៖ យុទ្ធសាស្ត្រចាញ់ទាំងអស់គ្នា គ្មានអ្នកណាឈ្នះ (Sore Loser Scenario)
នៅក្នុងការធ្វើសង្គ្រាមប្រដាប់អាវុធ ប្រទេសខ្លះដែលមើលស្ថានភាពមិនអាចមានប្រៀបលើគេ ហើយដឹងតែពីចាញ់គេ នឹងមានអារម្មណ៍មួយថា «បំណាច់នឹងចាញ់ហើយ កុំឲ្យមានអ្នកឈ្នះ គឺត្រូវតែចាញ់ទាំងអស់គ្នា»។ ដូចនេះ គេនឹងប្រើអាវុធបរមាណូកម្ទេចគ្នាឲ្យខ្ទេចតែម្ដង។

កាលពីក្នុងសម័យសង្គ្រាមត្រជាក់ យុទ្ធសាស្ត្ររបស់បក្សសម្ព័ន្ធណាតូ (NATO) មានលក្ខណៈសាមញ្ញ ៖ «ណាតូយល់ថាខ្លួនមិនអាចវាយឈ្នះអតីតសហភាពសូវៀតទេ ដូចនេះយុទ្ធសាស្ត្ររបស់ណាតូគឺ ប្រសិនបើ សូវៀតវាយលុកចូលអឺរ៉ុបខាងលិច មានន័យស្មើនឹងរុញណាតូ ឲ្យទល់ជញ្ជាំង ហើយណាតូគ្មានជំរើសអ្វី ក្រៅពីប្រើគ្រាប់បរមាណូទេ។ សូវៀត ប្រសិនបើណាតូប្រើបរមាណូ ក៏សូវៀតគ្មានជំរើសក្រៅពីប្រើបរមាណូវាយតបទៅវិញ ទីបំផុតរលាយហិនហោចទាំងអស់គ្នា។ នេះជាអតីតកាល។

...មហាយក្សអាស៊ី កំពុងសម្ងំផលិត «គ្រាប់បរមាណូហ្វូង» ស្ងាត់ៗមិនឲ្យគេដឹង...
ងាកមកអនាគតកាល។ ប្រសិនបើ ប្រទេសចិនប្រើកម្លាំងយោធានៅតំបន់ប៉ាស៊ីហ្វិក (សមុទ្រចិនខាងត្បូង និងខាងកើត) ហើយបញ្ឆេះភ្លើងសង្គ្រាម ចិននឹងប្រឈមជាមួយសហរដ្ឋអាមេរិក។ ចិនគ្មានក្រឡាឈ្នះអាមេរិកទេ ដឹងច្បាស់ថាមុខជាចាញ់។ ដូចនេះ អាវុធបរមាណូនេះឯងជាជំរើសចុងក្រោយរបស់ចិន។ ពាក្យ «ចាញ់ទាំងអស់គ្នា» មានន័យថា ការប្រើគ្រាប់បែកបរមាណូជាជំរើសសម្រាប់អ្នកដែលមើលក្រឡាមិនអាចឈ្នះគេទៅរួច ម៉្លោះហើយ មានតែប្រើអាវុធនេះទេ ឲ្យខ្ទេចទាំងអស់គ្នាតែម្ដងទៅ៕

វៀតណាមស្ថិតនៅលំដាប់លេខរៀងទី៥ នៃក្រុមវិនិយោគិនបរទេសធំៗនៅកម្ពុជា

ប្រទេសវៀតណាមស្ថិតនៅលំដាប់លេខរៀងទី៥នៃបណ្ដាវិនិយោគិនបរទេសធំៗនៅកម្ពុជាក្នុងនោះគម្រោងវិនិយោគប្រមាណជាង៥០បាននឹងកំពុងតែដំណើរការ ។

តាមការបញ្ជាក់ពីសមាគមវិនិយោគិនវៀតណាមនៅកម្ពុជាក្នុងដំណើរទស្សនកិច្ចរបស់ប្រធានាធិបតីវៀតណាមកាលពីពេលថ្មីៗនេះឱ្យដឹងថាគម្រោងវិនិយោគធំៗរបស់វៀតណាមរួមមានការវិនិយោគទៅដំណាំកៅស៊ូរបស់ក្រុមហ៊ុន Hoang Anh Gia Lai Group និងក្រុមហ៊ុនកៅស៊ូវៀតណាម រោងចក្រផលិតជី មន្ទីរពេទ្យជោរៃនៅរាជធានីភ្នំពេញ ក្រុមហ៊ុនអាកាសចរវៀតណាមនិង វិស័យធនាគារហិរញ្ញវត្ថុជាដើម។

...វៀតណាមឈប់នាំចូលបន្លែ និងផ្លែឈើអូស្ត្រាលីមានតម្លៃជាទឹកប្រាក់ ៤០លានដុល្លារដោយសារបញ្ហាសត្វល្អិត...

ប្រធានក្រុមហ៊ុនហុងអាញ់យ៉ាឡាយ - Hoang Anh Gia Lai Group លោកដូនង្វៀនដុក (Doan Nguyen Duc) មានប្រសាសន៍ថាទំហំទឹកប្រាក់វិនិយោគ មានចំនួន ៣០០ លានដុល្លារ ដើម្បីដាំកៅស៊ូនៅលើផ្ទៃដី ៤០០០០ ហិកតា (បួនម៉ឺន) ហើយមានការវិនិយោគទៅលើដំណាំដូងប្រេង និងកសិដ្ឋានចិញ្ចឹមគោដែលមានរហូត ១០០០០០ ក្បាល (មួយសែន)។

យោងតាមសេចក្តីថ្លែងការណ៍រួម រវាងព្រះរាជាណាចក្រកម្ពុជានិងសាធារណរដ្ឋប្រជាមានិតចិន កាលពីថ្ងៃទី២៤ ខែធ្នូ លើកឡើងថាភាគីទាំងពីរបានឯកភាពក្នុងការពិនិត្យឡើងវិញនូវគោលនយោបាយទាំងឡាយ ដើម្បីជំរុញពាណិជ្ជកម្មនៃប្រទេសទាំងពីរឱ្យឡើងដល់ ៥ ពាន់លានដុល្លារអាមេរិក នៅឆ្នាំ២០១៥ ៕

Friday, December 19, 2014

ធនាគារពិភពលោកបង្ហាញប្រទេស ៥ នឹងមានកំណើនសេដ្ឋកិច្ចលូតលាស់ខ្លាំងក្លានៅឆ្នាំ ២០១៥ នេះ

រដ្ឋធានី Ulan Bator ប្រទេសម៉ុងហ្គោលីប្រភព៖ coolmongolia

ធនាគារពិភពលោក (World Bank)បានទម្លាក់អត្រាព្យាករណ៍របស់ខ្លួនលើកំណើនសេដ្ឋកិច្ចពិភពលោកពី ៣,៣% មកត្រឹម ៣,១%នៅក្នុងឆ្នាំ ២០១៤ នេះ ខណៈឆ្នាំ ២០១៥ ខាងមុខ ខ្លួនបានព្យាករណ៍ថា កំណើនសេដ្ឋកិច្ចពិភពលោកអាចមានកំណើន ៣,៣%។

ទន្ទឹមនឹងរបាយការណ៍របស់ខ្លួន (Global Economic Prospects) ធនាគារនេះបានរកឃើញ និង ព្យាករណ៍ប្រទេសចំនួន ២០ ដែលមានសេដ្ឋកិច្ចលូតលាស់ខ្លាំងក្លាជាងគេនៅក្នុងឆ្នាំ ២០១៥ ខាងមុខនេះ។ ទោះបីជាបែបនេះក្តី TheBNEWS សូមលើកយកប្រទេសត្រឹមតែ ៥ ប៉ុណ្ណោះដែលនឹងមានសេដ្ឋកិច្ចលូតលាស់ខ្លាំងជាងគេដែលក្នុងនោះរួមមាន៖

៥) ប្រទេសចិន
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +៧,៩០%
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +៨,៤០%
-កំណើនផលិតផលក្នុងស្រុកសរុប (GDP)ពីឆ្នាំ ២០១៣ ដល់ ឆ្នាំ ២០១៥: +៨,៧៧%។

៤) ប្រទេសសេរ៉ាឡេអូន
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +២៥,០០%
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១១,១០%
-កំណើនផលិតផលក្នុងស្រុកសរុប (GDP)ពីឆ្នាំ ២០១៣ ដល់ ឆ្នាំ ២០១៥: +៩,៥៤%។

៣) ប្រទេសសាធារណរដ្ឋប្រជាធិបតេយ្យទីម័រ
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១០,០០%
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១០,០០%
-កំណើនផលិតផលក្នុងស្រុកសរុប (GDP)ពីឆ្នាំ ២០១៣ ដល់ ឆ្នាំ ២០១៥: +១០,៦៣%។

២) ប្រទេសអ៊ីរ៉ាក់
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១១,១០%
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១៣,៥០%
-កំណើនផលិតផលក្នុងស្រុកសរុប (GDP)ពីឆ្នាំ ២០១៣ ដល់ ឆ្នាំ ២០១៥: +១២,២៣%។

១) ប្រទេសម៉ុងហ្គោលី
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១១,៨០%
-កំណើនផលិតផលក្នុងស្រុកសរុប (GDP)ប្រចាំឆ្នាំ ២០១២: +១៦,២០%
-កំណើនផលិតផលក្នុងស្រុកសរុប (GDP)ពីឆ្នាំ ២០១៣ ដល់ ឆ្នាំ ២០១៥: +១៣,៦០%។

ដោយឡែកបើយោងតាមរបាយការណ៍ដដែលបានបញ្ជាក់ថា ប្រទេសកម្ពុជា បានជាប់ចំណាត់ថ្នាក់ទី ១៩ ក្នុងចំណោមប្រទេសដែលមានសេដ្ឋកិច្ចលូតលាស់ខ្លាំងក្លាទាំង ២០ គិតចាប់ពីឆ្នាំ ២០១៣ រហូតដល់ឆ្នាំ ២០១៥ ខាងមុខ៕

Thursday, December 11, 2014

ការងារ៧ យ៉ាងដែលមហាសេដ្ឋី Warren Buffett ធ្វើ ដើម្បីសន្សំលុយទុក ៥៣ ០០០ដុល្លារ នៅអាយុ ១៦ឆ្នាំ

លោក Warren Buffett មហាសេដ្ឋីអាមេរិកប្រភព៖ sproutmoney

ប្រិយមិត្តពិតជាធ្លាប់ស្គាល់ហើយថា លោក Warren Buffett គឺជាមហាសេដ្ឋីអាមេរិកមានជាងគេបំផុតលំដាប់ទី៤ នៅលើពិភពលោកនាពេលបច្ចុប្បន្ននេះដែលមានទ្រព្យសម្បត្តិប្រមាណ ៧៣,១ ពាន់លានដុល្លារ។ នេះបើយោងតាមការឲ្យដឹងពីទស្សនាវដី្ត Forbes ។

ប៉ុន្តែអ្វីដែលគួរឲ្យចាប់អារម្មណ៍នៅពេលនេះនោះគឺថា តើមហាសេដ្ឋីវ័យ ៤៨ ឆ្នាំរូបនេះបានធ្វើអ្វីខ្លះមុននឹងលោកក្លាយជាមហាសេដ្ឋីដ៏ល្បីល្បាញនៅពេលបច្ចុប្បន្ន? តាមការអះអាងរបស់លោកផ្ទាល់ ខាងក្រោមនេះគឺជាការងារទាំង ៧ យ៉ាងដែលលោកធ្លាប់បានធ្វើនៅពេលលោកមានអាយុមុន ១៦ ឆ្នាំ។

១) ដើរលក់ទឹកភេសជ្ជះ និង ស្ករកៅស៊ូ
ការលក់ភេសជ្ជះសូដា និង ស្ករកៅស៊ូគឺជាការងារដែលដំបូងគេបំផុតដែលមហាសេដ្ឋី Warren Buffett ធ្វើមុនគេនៅអាយុតាំងពី ៦ ឆ្នាំមកម្ល៉េះ។ លោកបានចាប់ផ្តើមលក់ស្ករកៅស៊ូមួយរយៈ ហើយក្រោយមកបានប្តូរមកលក់ភេសជ្ជៈកូកាកូឡាជំនួសវិញដែលបានប្រាក់ចំណូលច្រើនជាងមុន។

២) អ្នកចែកចាយកាសែតតាមផ្ទះ
ជាក្មេងម្នាក់ដែលចូលចិត្តតាមដានព័ត៌មាន លោក Warren Buffett ក៏ធ្លាប់ដើរចែកចាយកាសែតតាមផ្ទះម្នាក់ផងដែរ ដែលផ្ទុយពីចំណង់ចំណូលចិត្តក្មេងៗដទៃទៀតលើការងារនេះ។ លោកពេញចិត្តការងារនេះណាស់ ដែលជាផ្នែកមួយជួយបង្កើតប្រាក់ចំណូលបន្ថែមដល់លោក។

៣) លក់គ្រាប់បាល់វាយកូនគោលចាស់ៗ
នេះជាការងារមួយទៀតដែលលោក Warren Buffettបានលក់ជាមួយមិត្តភក្ដិរបស់លោកម្នាក់ទៀតគឺលោក Stu Erickson។ លោកបានយកគ្រាប់បាល់វាយកូនគោលចាស់ៗដែលគេបោះចោលពីទីលានវាយកូនគោល Elmwood Park ក្នុងរដ្ឋ Illinois ។ ការងារនេះលោកតែងប្រឈមមុខជាមួយឆ្មាំសន្តិសុខ តែលោកនៅតែគិតថា ជារឿងធម្មតា និងជាការងារដែលលោកមានមោទនភាពបំផុតមួយដែរ។

...មហាសេដ្ឋី និងបុគ្គលល្បីៗ៨រូបគ្រោងបរិច្ចាគទ្រព្យសម្បត្តិរបស់ខ្លួនទាំងស្រុងពេលស្លាប់ ដោយមិនទុកឱ្យកូនៗ និងគ្រួសារ...

៤) លក់សណ្ដែកដីលីង និង ពោតផ្ទុះក្នុងព្រឹត្តិការណ៍កីឡាបាល់អោប
ប្រជាជនអាមេរិកចូលចិត្តកីឡាបាល់អោបណាស់ ហេតុដូច្នេះពេលមានព្រឹត្តិការណ៍នេះម្តងៗ មានទស្សនិកជនជាច្រើនចូលរួមទស្សនាកម្មវិធីនេះ។ ឆ្លៀតពេលមានកម្មវិធីនេះម្តងៗ លោក Warren Buffett បានដើរលក់សណ្ដែកដីលីង និង ពោតផ្ទុះនៅពហុកីឡាដ្ឋានសាកលវិទ្យាល័យ Omaha និង នៅតាមទីតាំងព្រឹត្តិការណ៍កីឡាជាច្រើនទៀត។

៥) លក់តែម
ក្រៅពីការងារទាំងប៉ុន្មានខាងលើ នៅមានការងារមួយទៀតដែលលោក Warren Buffett ធ្លាប់ធ្វើដែរនោះគឺដើរលក់តែម។ លោកត្រូវបានអាជ្ញាធរផ្តល់សិទ្ធអនុញ្ញាតឲ្យលក់តែមនេះដើម្បីយកប្រាក់ចំណូលមកផ្គត់ផ្គង់ក្នុងគ្រួសារ។

៦) រកលុយបានពីការបើកក្រុមហ៊ុនម៉ាស៊ីនហ្គេម
លោក Warren Buffett បានទិញម៉ាស៊ីនហ្គេម (pinball machine) មួយក្នុងតម្លៃ ២៥ ដុល្លារ និង បានយកទៅផ្ទះមិត្តភក្ដិរបស់លោកដើម្បីជួសជុលឡើងវិញ។ ក្រោយមក អ្នកទាំងពីរបានបើកក្រុមហ៊ុនលេងហ្គេមមួយឈ្មោះ ថា Wilson’s Coin-Operated Machine ដែលអាចរកប្រាក់ចំណូលបាន ៤ ដុល្លារក្នុងមួយថ្ងៃ។ ១ សបា្តហ៍ក្រោយមក លោកអាចមានលទ្ធភាពទិញម៉ាស៊ីនហ្គេមមួយគ្រឿងទៀត ហើយចេះតែរីកចម្រើនឡើងពីមួយថ្ងៃទៅមួយថ្ងៃ រហូតដល់បើកនៅតាមក្លឹបកម្សាន្តមួយចំនួនទៀត។

៧) រកលុយបានពីកន្លែងប្រណាំងសេះ
លុយដែលលោករកបាននៅកន្លែងប្រណាំងសេះ មិនមែនបានមកពីការភ្នាល់គ្នានោះទេ តែជាការប្រមូលបាននូវសំបុត្រទស្សនាមួយចំនួនដែលទស្សនិកជនបោះចោល ឬ ធ្លាក់ជ្រុះមិនដឹងខ្លួន។ លោកបានយកសំបុត្រទាំងនោះទៅលក់បន្ត ដើម្បីរកលុយបន្ថែមជាមួយមិត្តភក្ដិម្នាក់ទៀត។ ការងារទាំងនេះ បានធ្វើឲ្យលោកអាចសន្សំប្រាក់ទុកបានរហូតដល់ ៥៣ ០០០ ដុល្លារនៅពេលដែលលោកមានអាយុ ១៦ ឆ្នាំ៕

Tuesday, December 9, 2014

តើអ៊ីនធឺណិតនៅលើពិភពលោកនេះ ដំណើរការយ៉ាងដូចម្ដេច?

តើអ៊ីនធឺណិតដំណើរការយ៉ាងដូចម្ដេច?ប្រភព៖ pixgood.com

និយមន័យដ៏សាមញ្ញនៃអ៊ីនធឺណិតគឺជា បណ្ដាញកុំព្យូទ័រភ្ជាប់ចូលគ្នាដោយខ្សែទូរស័ព្ទ ឬតំណភ្ជាប់តាមផ្កាយរណប និងមធ្យោបាយផ្សេងទៀតនៅទូទាំងពិភពលោក។ ប្រព័ន្ធតំណភ្ជាប់នេះ មានលក្ខណៈសកលនៃបណ្ដាញកុំព្យូទ័រលើពិភពលោកតភ្ជាប់គ្នា ហើយប្រើប្រាស់ឈុតពិធីការអ៊ីនធឺណិតស្តង់ដារ (TCP/IP) ដើម្បីតភ្ជាប់ឧបករណ៍យ៉ាងច្រើនរាប់ពាន់លានគ្រឿងលើពិភពលោក។ វាមានលក្ខណៈជាបណ្ដាញអន្តរជាតិ ដែលបច្ចុប្បន្នកំពុងមានស្ថាប័នរដ្ឋ និងឯកជនរាប់លានលើពិភពលោក ក្រុមហ៊ុនពាណិជ្ជកម្ម រដ្ឋាភិបាលតាមបណ្ដាញប្រទេសនានាលើលោក កំពុងប្រើប្រាស់តាមបច្ចេកវិទ្យាតំភ្ជាប់ផ្សេងៗគ្នា ដោយប្រើខ្សែ ឬ wireless ឬបច្ចេកវិទ្យាបណ្ដាញអុបទិកជាដើម។

ជាធម្មតាកុំព្យូទ័រដែលមានទំនាក់ទំនងគ្នានៅលើអ៊ីនធឺណិតត្រូវបានបែងចែកជាពីរ គឺម៉ាស៊ីនមេ Server និងកម្មវិធី Browser នៅលើម៉ាស៊ីន Client សម្រាប់ភ្ជាប់ចូលគេហទំព័រណាមួយ។ តើលោកអ្នកធ្លាប់គិតទេថា តើមានចំនួនកុំព្យូទ័រសរុបទាំងអស់ប៉ុន្មានគ្រឿងដែលភ្ជាប់ចូលគ្នាក្លាយជាបណ្ដាញអ៊ីនធឺណិតនោះ?

... ចំនួនអ្នកប្រើអ៊ីនធឺណិតកើនឡើង ៦,៦% ស្មើនឹង ៣ពាន់លាននាក់ចុងឆ្នាំ២០១៤ ...

មនុស្សជាច្រើន នាពេលបច្ចុប្បន្ន កំពុងប្រើអ៊ីនធឺណិត សម្រាប់ការទាក់ទងគ្នា ឬតាមប្រព័ន្ធផ្សេងៗទៀត និងមានបណ្ដាញទំនាក់ទំនងសង្គមជាច្រើន តាមអ៊ីនធឺណិត។ អ៊ីនធឺណិតចាប់ផ្ដើមលេចចេញជាទ្រង់ទ្រាយ នៅទសវត្ស៍ទី៦០ ក្នុងសហរដ្ឋអាមេរិក នៅពេលរដ្ឋាភិបាល និងក្រុមហ៊ុនខ្លះ ចង់បង្កើតបណ្ដាញកុំព្យូទ័រ ដែលជួយដំណើរការក្នុងការទាក់ទងគ្នា។ អ្នកប្រើប្រាស់អ៊ីនធឺណិត ច្រើនជាងគេ គឺនៅប្រទេសចិន ហើយភាសាអង់គ្លេស គឺជាភាសាដែលពេញនិយមបំផុត មានគេហទំព័រយ៉ាងច្រើនកំពុងប្រើប្រាស់នៅលើអ៊ីនធឺណិត ចំណែកភាសាខ្មែរគឺនៅមានតិចតួចប៉ុណ្ណោះ។

ជាធម្មតាកុំព្យូទ័ររបស់អ្នកក៏ត្រូវបានរាប់បញ្ចូលនៅក្នុងនោះផងដែរ ហើយនៅមានកុំព្យូទ័រយ៉ាងច្រើនសន្ធឹកសន្ធាប់កំពុងត្រូវបានប្រើពីតាមគេហដ្ឋាន តាមការិយាល័យ … និងពីគ្រប់ទិសទីនៅលើពិភពលោក ដែលត្រូវបានគេតភ្ជាប់គ្នា ប៉ុន្តែអ្នកមិនចាប់អារម្មណ៍។ តាមរយៈតំណភ្ជាប់ម៉ាស៊ីនកុំព្យូទ័រជាច្រើន និងយ៉ាងទូលំទូលាយលើពិភពលោក ចុងក្រោយត្រូវបានគេហៅដំណើរការនេះថាជា “អ៊ីនធឺណិត”។ តើវាមានទំនាក់ទំនងនឹងកុំព្យូទ័រដទៃដូចម្ដេច? នៅទំព័រនេះ យើងនឹងមកស្វែងយល់អំពីដំណើរការរបស់អ៊ីនធឺណិតទាំងអស់គ្នា។ តើអ៊ីនធឺណិតដំណើរការយ៉ាងដូចម្ដេច?

ដូចការបញ្ជាក់ខាងលើអីចឹង ធាតុផ្សំរបស់អ៊ីនធឺណិតគឺមានពីរចំណុច គឺ (១) ម៉ាស៊ីនមេ ឬដែលយើងហៅថា Server និងមួយទៀត (២)កម្មវិធី Browser ដែលអាចឱ្យលោកអ្នកប្រើសម្រាប់ភ្ជាប់ចូលទៅកាន់គេហទំព័រទាំងឡាយរបស់បណ្ដាក្រុមហ៊ុន អង្គការ ស្ថាប័នរដ្ឋ និងឯកជន ឬរបស់បុគ្គលឯកជនជាដើម។

... គម្រោងផ្គត់ផ្គង់អ៊ីនធឺណិតតាមបាល់ឡុងរបស់ Google ដំណើរការហើយមួយថ្ងៃបង្ហោះ ២០ ...

-ម៉ាស៊ីនមេ (Sever)៖ គឺជាកន្លែងផ្ទុកនូវរាល់ព័ត៌មានយ៉ាងច្រើនសម្បូរបែបនៅលើអ៊ីនធឺណិតដែលមានលក្ខណៈអនឡាញ ពោលគឺត្រូវមានដំណើរការជាប់លាប់ “lives”។ ម៉ាស៊ីនកុំព្យូទ័រទាំងនោះ ត្រូវមានសមត្ថភាពខ្ពស់ៗ ត្រូវបានប្រើសម្រាប់ផ្ទុកព័ត៌មាន ចែករំលែកព័ត៌មានជាមួយម៉ាស៊ីនមេ (Server) ដទៃ និងធ្វើឱ្យព័ត៌មានដែលកំពុងរក្សាទុកទាំងអស់ អាចត្រូវបានគេភ្ជាប់ចូលប្រើទូទៅជាសាធារណៈ។

-កម្មវិធីបើកមើលគេហទំព័រ (Browser)៖ គឺជាកម្មវិធីដែលគេប្រើសម្រាប់ភ្ជាប់ទៅកាន់វើលវ៉ាយវ៉េប (WWW = World Wide Web) ពីកុំព្យូទ័រស្តង់ដារនានាលើពិភពលោក។ ជាក់ស្ដែង ខណៈពេលនេះលោកអ្នកកំពុងបើកមើលព័ត៌មាននៅលើគេហទំព័រ TheBNEWS អីចឹងដែរ គឺត្រូវប្រើកម្មវិធី Browser ណាមួយដើម្បីឆែកមើលបាន (Firefox, Google Chrome, IE, Safari, Opera …)

នៅពេលអ្នកភ្ជាប់កុំព្យូទ័ររបស់ខ្លួនទៅកាន់អ៊ីនធឺណិត គឺមានន័យថា អ្នកកំពុងភ្ជាប់ទំនាក់ទំនងជាមួយម៉ាស៊ីន Server ពិសេសណាមួយ ដែលត្រូវបានផ្ដល់ឲ្យ និងត្រូវបានប្រតិបត្តិដោយក្រុមហ៊ុនផ្ដល់សេវាអ៊ីនធឺណិត ឬក្រុមហ៊ុនទូរគមនាគមន៍ (ISP)។ ការងាររបស់ ISP Server គឺផ្ដល់តំណភ្ជាប់រវាងកម្មវិធី Browser និងដើមជម្រកនៃអ៊ីនធឺណិត។ ម៉ាស៊ីន ISP sever មួយគឺគ្រប់គ្រងការភ្ជាប់អ៊ីនធឺណិតនៃកម្មវិធី browser ដែលអាចកំពុងត្រូវបានប្រើប្រាស់ ភ្ជាប់ចូលដោយមនុស្សរាប់ពាន់នាក់មកលើ Server តែមួយដូចគ្នា ដែលលោកអ្នកក៏កំពុងភ្ជាប់នៅពេលនេះផងដែរ។

ខាងក្រោមនេះគឺជាដំណាក់កាល មានការប្រតិបត្តិផ្សេងៗគ្នាជាច្រើនដំណាក់កាលនៅពេលអ្នកបើកមើលគេហទំព័រនៅលើកម្មវិធី Browser ម្ដងៗ៖
១) អ្នកប្រាកដជាត្រូវវាយបញ្ចូលអាសយដ្ឋាន (URL) នៅក្នុងប្រអប់អាសយដ្ឋាន ឬក៏ចុចលើតំណភ្ជាប់ hyperlink ក៏បាន។
២) កម្មវិធី browser នឹងផ្ញើសំណើ (send request) ទៅកាន់ ISP server ដើម្បីស្នើគេហទំព័រ (Page)
៣) ISP server របស់អ្នក នឹងស្វែងរកព័ត៌មានដែលអ្នកចង់បានពីបណ្ដុំទិន្នន័យដ៏ច្រើនមហាសាលនៅលើអាសយដ្ឋានអ៊ីនធឺណិត ហើយស្វែងរក host server ជាក់លាក់មួយដែលជាម្ចាស់វែបសាយ បន្ទាប់មកផ្ញើសំណើ (send request) ទៅកាន់ host server នោះដើម្បីបើកចេញទំព័រ (Page) ឱ្យលោកអ្នកបានឃើញ។
៤) host server ផ្ញើទំព័រដែលបានស្នើ ទៅឱ្យ ISP server។
៥) ISP របស់អ្នក ផ្ញើទំព័រ (Page) ទៅកាន់កម្មវិធី Browser ហើយអ្នកនឹងបានឃើញព័ត៌មានទាំងឡាយបង្ហាញមកលើអេក្រង់កុំព្យូទ័រ ឬឧបករណ៍អេឡិចត្រូនិកផ្សេងៗ។

... កេ្មងប្រុសឥណ្ឌាអាយុ៨ ឆ្នាំសោះ កាន់តំណែងជានាយកប្រតិបត្តិហើយធ្វើជាវាគ្មិនក្នុងសន្និសីទសន្តិសុខអ៊ីនធឺណិតដ៏ធំទៀត! ...

ISP server ទទួលសំណើ (receive request) ពីកម្មវិធី browser ដើម្បីបើក webpage ឬឆែកមើលអ៊ីមែលបាន ។ល។ ជាការពិតណាស់រាល់ម៉ាស៊ីន server ទាំងឡាយ មិនអាចផ្ទុកព័ត៌មានទាំងស្រុងនៅលើអ៊ីនធឺណិតអស់នោះទេ ដូច្នេះដើម្បីផ្ដល់ព័ត៌មានផ្សេងៗ ទាំង page និងឯកសារ (file) ទៅកាន់ browser ដែលគេស្នើ នោះ ISP server ត្រូវភ្ជាប់ជាមួយម៉ាស៊ីន Server អ៊ីនធឺណិតផ្សេងៗទៀត។ វានឹងនាំអ្នកទៅកាន់ប្រភេទម៉ាស៊ីន Server ជាច្រើនផ្សេងគ្នាដែលជាប្រភេទ Host Server។ ម៉ាស៊ីន Host server គឺជាកន្លែងដែលវែបសាយអនឡាញជាប់ (live)។ រាល់វែបសាយទាំងឡាយនៅលើពិភពលោក គឺមានទីតាំងស្ថិតនៅក្នុង Host server (ឧទាហរណ៍៖ MediasCollege.Com) គឺត្រូវបាន host នៅលើម៉ាស៊ីន Server របស់អាមេរិកស្ថិតនៅក្នុងតំបន់ Parsippany រដ្ឋ New Jersy។ ការងាររបស់ host server គឺធ្វើការរក្សាព័ត៌មាន និងធ្វើឲ្យវាអាចប្រើប្រាស់បានដល់ម៉ាស៊ីន Server ជាច្រើនទៀត។

អាសយដ្ឋានអ៊ីនធឺណិត
ដោយសារអ៊ីនធឺណិតគឺជាបណ្ដាញកុំព្យូទ័រសកល ហើយរាល់កុំព្យូទ័រទាំងអស់ត្រូវបានតភ្ជាប់គ្នាយ៉ាងធំទូលំទូលាយក្លាយទៅជាបណ្ដាញអ៊ីនធឺណិត ដូច្នេះវាត្រូវមានអាសយដ្ឋានមួយជាក់លាក់ដោយខ្លួនឯង។ អាសយដ្ឋានអ៊ីនធឺណិត (Internet addresses) គឺមានទម្រង់ nnn.nnn.nnn.nnn ដែល nnn ត្រូវតែជាលេខដែលមានចន្លោះពី 0-255។ អាសយដ្ឋាននេះត្រូវបានស្គាល់ថាជា IP address (ស្តង់ដារ IP សម្រាប់ Internet Protocol)។

លក្ខណៈនៃតំណភ្ជាប់អ៊ីនធឺណិតនៅលើម៉ាស៊ីនកុំព្យូទ័រ
បច្ចុប្បន្នម៉ាស៊ីនកុំព្យូទ័រដែលដែលបានតភ្ជាប់គ្នាជាបណ្ដាញ គឺមានច្រើនរហូតរាប់រយលានគ្រឿង ប៉ុន្តែការភ្ជាប់គឺមិនដូចៗគ្នានោះទេ។ ឧបករណ៍មួយចំនួនដើរតួនាទីជា កន្លែងរក្សាទុកនូវរាល់ព័ត៌មាន ហើយផ្ញើវាចេញទៅ នៅមានទទួលបានសំណើ។ កុំព្យូទ័រប្រភេទនេះគេហៅថា ជាម៉ាស៊ីន Server។ ម៉ាស៊ីនសម្រាប់រក្សាទុកឯកសារ គេឱ្យឈ្មោះថា file servers ហើយនៅពេលអ្នកផ្ញើអ៊ីមែល នោះគេហៅថា ជាម៉ាស៊ីន mail server និងនៅពេលអ្នកបើកចូលគេហទំព័រណាមួយ នោះគេហៅថា Web Server។ កុំព្យូទ័រដែលទទួលព័ត៌មានពីម៉ាស៊ីនមេ Server ត្រូវបានហៅឈ្មោះថា ម៉ាស៊ីន Client។ នៅពេលកុំព្យូទ័ររបស់អ្នក ភ្ជាប់ទៅនឹងអ៊ីនធឺណិត ដើម្បីប្រើ mail serveនៅក្រុមហ៊ុនផ្គត់ផ្គង់សេវាអ៊ីនធឺណិតរបស់អ្នក ដូច្នេះកុំព្យូទ័ររបស់អ្នកគឺជាម៉ាស៊ីន Client ហើយ ISP Computer គឺជាម៉ាស៊ីន Server។ សព្វថ្ងៃមាន clients យ៉ាងច្រើននៅលើអ៊ីនធឺណិត ច្រើនជាង Server ហើយការប្រើប្រាស់ក៏កំពុងកើនឡើងផងដែរ?៕

... ហេតុអ្វីបានជាប្រទេសកូរ៉េខាងត្បូងមានល្បឿនអ៊ីនធឺណិតលឿនជាងគេលើពិភពលោក? ...

ដឹងទេថា មានប្រទេសណាខ្លះ អត់មានទំនាក់ទំនងការទូតជាមួយអាមេរិក?

សហរដ្ឋអាមេរិក គឺជាប្រទេសមហាអំណាចស្ទើរតែគ្រប់វិស័យនៅលើពិភពលោក ហើយមានប្រទេសជាច្រើនមានទំនាក់ទំនងការទូតជាមហយយ។ ប៉ុន្តែក៏មានប្រទេសមួយចំនួនផងដែរ ដែលអាមេរិកមិនទាន់មានទំនាក់ទំនងជាផ្លូវការ ដោយសារតែបញ្ហាមួយចំនួន។

ខាងក្រោមនេះ គឺជាប្រទេសមួយចំនួន ដែលមិនមានទំនាក់ទំនងផ្លូវការជាមួយនឹង សហរដ្ឋអាមេរិក៖

១) ប្រទេសប៊ូតាន់
បើយោងតាម ក្រសួងការបរទេសរបស់សហរដ្ឋអាមេរិកឲ្យដឹងថា ប្រទេសខ្លួនមិនទាន់បានបង្កើតទំនាក់ទំនងផ្លូវការណាមួយជាមួយនឹង ព្រះរាជាណាចក្រប៊ូតាន់នៅឡើយទេ។ ប៉ុន្តែ រដ្ឋាភិបាលនៃប្រទេសទាំងពីរ ក៏មានទំនាក់ទំនងមិនផ្លូវការមួយចំនួនផងដែរ។ រាល់ទំនាក់ទំនងមិនផ្លូវការទាំងនោះ គឺធ្វើឡើងតាមរយៈស្ថានទូតរបស់អាមេរិកប្រចាំក្នុងទីក្រុងNew Delhi របស់ឥណ្ឌា ដែលជាប្រទេសជិតខាងរបស់ ប៊ូតាន់។

២) ប្រទេសគុយបា
គុយបា និង សហរដ្ឋអាមេរិក ត្រូវបានគេស្គាល់ថា ជាប្រទេសជិតខាងគ្នា ប៉ុន្តែរឿងដ៏ចម្លែកនោះ គឺប្រទេសទាំងពីរនេះ មិនមានទំនាក់ទំនងការទូតជាមួយគ្នានោះទេ។ ប្រទេសទាំងពី បានប្រឈមដាក់គ្នាជាច្រើនឆ្នាំមកហើយ ជាពិសេសចាប់តាំងពីឆ្នាំ ១៩៦១មកម្ល៉េះ។ បើស្ថិតក្នុងករណីដែលមានទំនាក់ទំនងមិនផ្លូវការណាមួយនោះ គឺត្រូវធ្វើឡើងតាមរយៈស្ថានទូតអាមេរិកប្រចាំក្នុងទីក្រុង Havana ប្រទេសស្វីស។

៣) ប្រទេសអ៊ីរ៉ង់
នៅថ្ងៃទី ៧ ខែ មេសាឆ្នាំ ១៩៨០ សហរដ្ឋអាមេរិកបានផ្តាច់ទំនាក់ទំនងការទូតជាមួយនឹងប្រទេសអ៊ីរ៉ង់ ហើយរហូតមកទល់នឹងពេលបច្ចុប្បន្ននេះ ភាគីទាំងពីរនៅមិនទាន់អាចបង្កើតទំនាក់ទំនងផ្លូវការជាមួយគ្នាឡើងវិញនៅឡើយ ដោយសារតែមានភាពតានតឹងជុំវិញ កម្មវិធីនុយក្លេអ៊ែរ និង ការរំលោភសិទ្ធិមនុស្សក្នុងប្រទេសអ៊ីរ៉ង់។
...ចិនថា នាវាមុជទឹកដើរដោយថាមពលនុយក្លេអ៊ែរ៉ាដាចាប់មិនបានរបស់ខ្លួន អាចវាយប្រហារដល់អាមេរិកក្នុងរយៈពេលខ្លីប៉ុណ្ណោះ!...
៤) ប្រទេសកូរ៉េខាងជើង
អាមេរិក និង កូរ៉េខាងជើង ត្រូវបានគេដឹងយ៉ាងច្បាស់ថា មានភាពតានតឹងជាមួយគ្នាមិនចេះចប់ ដោយសារតែកម្មវិធីនុយក្លេអ៊ែរ និង ការរំលោភសិទ្ធិមនុស្សរបស់រដ្ឋាភិបាលផ្ដាច់ការដែលដឹកនាំឲ្យ ក្រុមគ្រួសារត្រកូល គីម។ អាមេរិកតែងដាក់ទណ្ឌកម្មលើកូរ៉េខាងជើងជាញឹកញាប់ ហើយប្រទេសឯកានិយម (កូរ៉េខាងជើង) មួយនេះក៏គំរាមប្រើអាវុធនុយក្លេអ៊ែរចង់កំទេចអាមេរិកផងដែរ។ រហូតមកទល់នឹងពេលនេះ ប្រទេសទាំងពីរគ្មានទំនាក់ទំនងផ្លូវការជាមួយគ្នានោះទេ។
...ហេតុអ្វីបានជាវិស័យកសិកម្មថៃរីកចម្រើនខ្លាំង?...
៥) កោះតៃវ៉ាន់
សហរដ្ឋអាមេរិក មិនទទួលស្គាល់កោះតៃវ៉ាន់ជារដ្ឋឯករាជ្យមួយនោះទេ ដូច្នេះហើយភាគីទាំងពីរក៏មិនមានទំនាក់ទំនងផ្លូវការណាមួយនោះដែរ។ ថ្វីបើមិនមានទំនាក់ទំនងផ្លូវការក្តី ប៉ុន្តែទាំងអាមេរិក និង កោះតៃវ៉ាន់ តែងមានទំនាក់ទំនងមិនផ្លូវការជាច្រើនជាមួយគ្នា ជាពិសេសការធ្វើពាណិជ្ជកម្ម។ សូមបញ្ជាក់ថា កោះតៃវ៉ាន់តែងតែទិញអាវុធជាច្រើនពីអាមេរិក ដើម្បីពង្រឹងវិស័យការពារជាតិរបស់ខ្លួន ជាពិសេសក្នុងទិសដៅ ប្រឆាំងនឹងការគំរាមកំហែងពីរដ្ឋាភិបាលក្រុងប៉េកាំង ប្រទេសចិន៕

Sunday, December 7, 2014

តើសាសនាណាខ្លះនឹងត្រូវបានគេគោរពច្រើនជាងគេនៅក្នុងឆ្នាំ ២០៥០ ខាងមុខ?

ព្រះសង្ឃនៅក្នុងពុទ្ធសាសនាប្រភព៖ mediamax

ជាមួយប្រជាជនប្រមាណ ៧,២ ពាន់លាននាក់នាពេលបច្ចុប្បន្ននេះគេបានចាត់ចំណាត់ថ្នាក់សាសនាពិភពលោកចំនួន ១៩ ធំៗដែលជាជំនឿដ៏សំខាន់របស់មនុស្សជាតិគ្រប់ជាតិសាសន៍។ សាសនាទាំង១៩ ធំៗនេះបានបែងចែកជាសាសនាតូចៗប្រមាណ ២៧០ ផ្សេងទៀត ដែលនេះនៅមិនទាន់រាប់បញ្ចូលសាសនាមិនសូវលេចធ្លោជាច្រើនទៀតរបស់ប្រជាជនទាំងអស់នេះដែលមានជាបន្តបន្ទាប់តាំងពីមុនគ្រិស្តសករាជមកម្ល៉េះ។

យ៉ាងណាមិញអ្វីដែលជាចំណាប់អារម្មណ៍របស់ប្រិយមិត្ត TheBNEWS សូមបង្ហាញលោកអ្នក ថាតើសាសនាអ្វីខ្លះដែលនៅតែអាចស្ថិតនៅក្នុងជំនឿរបស់ប្រជាជនសាកលលោកនៅក្នុងឆ្នាំ ២០៥០ខាងមុខ?

១)សាសនាគ្រិស្ដ
-អ្នកគោរពឆ្នាំ ២០០០ មានចំនួន ១,៩៩ ពាន់លាននាក់
-ប្រទេសគោរពសាសនាគ្រិស្ដមានចំនួន ២៣៨ ប្រទេស
-អ្នកគោរពសាសនាគ្រិស្ដនៅក្នុងឆ្នាំ ២០៥០ មានចំនួន ៣, ០៥ ពាន់លាននាក់
-មានកំណើនពីឆ្នាំ ២០០០ ដល់ ឆ្នាំ ២០៥០ មានចំនួន ៥២,៦១% ឬ ស្មើនឹង ៣៤,៣% នៃប្រជាជនសាកលលោក។

២) សាសនាឥស្លាម
-អ្នកគោរពឆ្នាំ ២០០០ មានចំនួន ១,១៨៨ ពាន់លាននាក់
-ប្រទេសគោរពសាសនាឥស្លាមមានចំនួន ២០៤ ប្រទេស
-អ្នកគោរពសាសនាឥស្លាមនៅក្នុងឆ្នាំ ២០៥០ មានចំនួន ២, ២២ ពាន់លាននាក់
-មានកំណើនពីឆ្នាំ ២០០០ ដល់ ឆ្នាំ ២០៥០ មានចំនួន ៨៧,៦១% ឬ ស្មើនឹង ២៥,០% នៃប្រជាជនសាកលលោក។

...នេះជាហេតុផលបញ្ជាក់ថា ហេតុអ្វីបានជាប្រជាជនជប៉ុនអាយុវែង?...

៣) សាសនាហិណ្ឌូ
-អ្នកគោរពឆ្នាំ ២០០០ មានចំនួន ៨១២ លាននាក់
-ប្រទេសគោរពសាសនាហិណ្ឌូមានចំនួន ១១៤ ប្រទេស
-អ្នកគោរពសាសនាហិណ្ឌូនៅក្នុងឆ្នាំ ២០៥០ មានចំនួន ១, ១៧៥ ពាន់លាននាក់
-មានកំណើនពីឆ្នាំ ២០០០ ដល់ ឆ្នាំ ២០៥០ មានចំនួន ៤៤,៨៦% ឬ ស្មើនឹង ១៣,២% នៃប្រជាជនសាកលលោក។

៤) សាសនាព្រះពុទ្ធ
-អ្នកគោរពឆ្នាំ ២០០០ មានចំនួន ៣៦០ លាននាក់
-ប្រទេសគោរពសាសនាព្រះពុទ្ធមានចំនួន ១២៦ ប្រទេស
-អ្នកគោរពសាសនាព្រះពុទ្ធនៅក្នុងឆ្នាំ ២០៥០ មានចំនួន ៤២៤,៦ លាននាក់
-មានកំណើនពីឆ្នាំ ២០០០ ដល់ ឆ្នាំ ២០៥០ មានចំនួន ១៧,៩៥% ឬ ស្មើនឹង ៤,៨% នៃប្រជាជនសាកលលោក។

៥) សាសនាស៊ិក (Sikhism )
-អ្នកគោរពឆ្នាំ ២០០០ មានចំនួន ២៣,២ លាននាក់
-ប្រទេសគោរពសាសនាស៊ិកមានចំនួន ៣៤ប្រទេស
-អ្នកគោរពសាសនាស៊ិកនៅក្នុងឆ្នាំ ២០៥០ មានចំនួន ៣៧,០៥ លាននាក់
-មានកំណើនពីឆ្នាំ ២០០០ ដល់ ឆ្នាំ ២០៥០ មានចំនួន ៥៩,៣៤% ឬ ស្មើនឹង ០,៤% នៃប្រជាជនសាកលលោក។

សូមបញ្ជាក់ថា សាសនាស៊ិក (Sikhism ) ត្រូវបានកើតឡើងជាលើកដំបូងនៅក្នុងកំឡុងសតវត្សទី១៥ នេះតែប៉ុណ្ណោះនៅក្នុងតំបន់ Punjab ហើយប្រទេសដែលគោរពសាសនានេះមាននៅបណ្ដាប្រទេសស្ថិតនៅក្នុងឧបទ្វីបឥណ្ឌាដែលមានជាអាទិ៍ ប្រទេសឥណ្ឌា ប៉ាគីស្ថាន បង់ក្លាដេស ស្រីលង្កា នេប៉ាល់ ប៊ូតាន់ ។ល៕